எம்.ஜி.ஆர். படத்தில் எந்திரன் கதை

வணக்கம் மக்களே....

எந்திரன் படத்தை வைத்து சில ஆராய்ச்சிகளை மேற்கொண்டதன் விளைவே இந்தப் பதிவு. பதிவிற்கு போவதற்கு முன்னால் ஒரு புதிர் கேள்வி. எந்திரன் படத்தின் கதையின் படி சனாவின் வயது என்ன...? விடை பதிவின் இறுதியில்... யாரும் ஸ்க்ரோல் பண்ணாதீங்க மக்களே.

சில வாரங்களுக்கு முன்பு ஒரு மாலைப்பொழுதில் நடந்த சம்பவம். தொலைகாட்சியின் ஆட்சி, அதாங்க ரிமோட் கண்ட்ரோல் அந்த கருமாந்திரம் என் தந்தையின் கையில் இருந்தது. மனிதர் மக்கள் தொலைக்காட்சிக்கும் மாக்கள் (டிஸ்கவரி) தொலைக்காட்சிக்கும் தாவிக்கொண்டிருந்தார். இன்ட்லியில் எழுபது வாக்குகள் வாங்கச் சொன்னால் கூட வாங்கிவிடலாம், ஆனால் இவரிடம் இருந்து ரிமோட்டை வாங்குவது கடினம். திருதிருவென்று முழித்துக் கொண்டிருக்கும்போது டபக்கேன்று கே டி.வி வைத்துவிட்டார். அதில் ஏதோ ஒரு எம்.ஜி.ஆர் படம் ஓடிக்கொண்டிருந்தது. போச்சுடா இனி படம் முடியும் வரை சேனல் மாறாதென்று பெருமூச்சு விட்டுக்கொண்டேன்.

“ஹீரோவும் ஹீரோயினும் ஒருவரை ஒருவர் லவ்வுகிறார்கள். ஆனால் வில்லனுக்கு ஹீரோயின் மீது ஒருதலைக் காதல். தன் காதலுக்கு இணங்க மறுக்கும் ஹீரோயினை வில்லன் கடத்திக் கொண்டுபோய் வீட்டுக்காவலில் வைத்திருக்கிறார். ஹீரோ அங்கே வில்லனுக்கு தெரியாதபடி மாறுவேஷம் (!!!) போட்டுக்கொண்டு உள்ளே நுழைகிறார். ஆனால் ஹீரோயினுக்கே ஹீரோவை அடையாளம் தெரியவில்லை. வில்லன் கண் அசரும் நேரத்தில் ஹீரோ தனது அடையாளத்தை ஹீரோயினிடம் நிரூபிக்கிறார். இருவரும் அங்கிருந்து தப்பிக்க முயல்கின்றனர். அதற்குள் வில்லன் இருவரையும் பிடித்துவிடுகிறான்....”

என்ன மேலே படித்த கதையை எங்கேயோ கேட்டதுபோல இருக்கிறதா...? இது தான் நம்ம எந்திரன் படத்தோட இரண்டாம் பாதியில் வரும் கதை. இதே கதைதான் அந்த எம்.ஜி.ஆர் படத்திலும் ஓடிக்கொண்டிருந்தது. ஹீரோயினாக புரட்சித்தலைவலி... ச்சே சாரி... புரட்சித்தலைவி. வில்லனாக நடிகர் அசோகன். அப்பாவிடம் என்ன படமென்று கேட்டதற்கு “நீரும் நெருப்பும்” என்று சொன்னார். யூடியூபில் தேடிப் பார்த்தேன் கிடைக்கவில்லை. பின்னர் கூகிள் கூடையில் தேடித் பார்த்ததில் ஒரு இணைப்பில் முழு படத்தையும் பார்க்கும் வாய்ப்பு கிட்டியது.

இரட்டை வேடத்தில் எம்.ஜி.ஆர். வெள்ளையாக இருப்பவர் நல்லவர், கறுப்பாக இருப்பவர் கெட்டவர் (அவ்வ்வ்வ்வ்....). மேலே சொன்ன எந்திரன் கதைக்கும் கறுப்பு எம்.ஜி.ஆருக்கும் (விஜயகாந்தை சொல்லவில்லை) எந்த சம்பந்தமும் இல்லை. வெள்ளை எம்.ஜி.ஆர் தான் ஜெ.வை காதலிக்கிறார். வில்லன் கடத்திக்கொண்டு போன தகவல் அறிந்ததும் மாறுவேடம் பூணுகிறார். வழக்கமாக பழைய படங்களில் மாறுவேடமென்றால் கன்னத்தில் மரு ஒன்றை ஒட்டிக்கொண்டு வில்லனை ஏமாற்றுவதாக காட்டி மக்களை ஏமாற்றுவார்கள். ஆனால் இந்தப் படத்தில் கொஞ்சம் வித்தியாசமாக ஹீரோ ஜப்பான் நாட்டை சேர்ந்த வைர வியாபாரியாக உள்ளே நுழைகிறார்.

வைர வியாபாரியாக தலைவர் பண்ணும் அட்டகாசங்கள் எல்லாம் செம காமெடி. அசோகனிடம் வந்து “யங் பிங் மங் சங்...” என்று ஏதேதோ உளறுகிறார். ஜப்பானிய மொழியில் பேசுறாராம். அதைவிட தலைவர் நடக்கும் நடை இருக்கிறதே. அப்பப்பா....! அதை எப்படி விவரிப்பது என்று தெரியவில்லை. ஆனால் நிச்சயமாக ஜப்பான் நாட்டுக்காரர்கள் அந்தக் காட்சியை பார்த்தால் தங்கள் நாட்டை அவமானப்படுத்திவிட்டதாக வழக்கு தொடர்ந்துவிடுவார்கள். இங்கே இணைப்பை கொடுக்கிறேன். நேரம் கிடைக்கும்போது பாருங்கள் மனதுவிட்டு சிரிக்கலாம். (எப்பா எம்.ஜி.ஆர் ரசிகர்கள் யாரும் கோவிச்சிக்காதீங்கப்பா... ச்சும்மா தமாஷ்....)

எந்திரன் படத்தை ஆர்வமாக பார்த்தவர்களுக்கு தெரிந்திருக்கும். இரண்டாம் பாதியில் சிட்டி மற்றும் அவரது அடிமை ரோபோக்கள் ஐஸை “ஹைனஸ்” என்று அழைப்பார்கள். நான் முதலில் இதனை “HYNUS” என்று புரிந்துக்கொண்டேன். ஏதாவது கிரேக்கக்கடவுளின் பெயராக இருக்கும் அல்லது சுஜாதா கொசுவுக்கு ரங்குஸ்கி என்று பெயர் வைத்தது போல ஐஸுக்கும் ஏதாவது பெயர் வைத்திருப்பார் என்று எண்ணிக்கொண்டேன். பின்னர் ஒருநாள் கூகிளில் தேடிப்பார்த்தும் “HYNUS” என்ற வார்த்தையை பற்றிய எந்தக் குறிப்புகளும் கிடைக்கப் பெறவில்லை. சென்ற வாரம் ட்விட்டரில் நண்பர் ஒருவர் அது “HYNUS” இல்லைப்பா “HIGHNESS” என்று தகவல் சொன்னார். நீங்க என்ன சொல்றீங்க....?

இறுதிக்கட்டத்திற்கு வந்துவிட்டோம். ஆரம்பத்தில் கேட்ட புதிருக்கான விடை 23 வயது. எப்படி என்று நிச்சயம் கேட்பீர்கள். ஐஸின் பிறந்தநாள் காட்சியில் சிட்டி சொல்லும் வசனம், “நீ இந்த பூமிக்கு வந்து இன்னையோட 2 லட்சம் மணிநேரம் ஆகுது.

So,

2,00,000 Hours / 24 = 8333.33 Days

8333.33 / 365 = 22.83 Years

Approximately 23 Years…

பாஸ்... பாஸ்... பேச்சு பேச்சா இருக்கணும். மொதல்ல அந்த கல்ல கீழே போடுங்க.

இப்படித்தான் நம்ம நண்பர் ஒருத்தர் ஆராய்ச்சி பண்ணி எந்திரன் படத்தில் ஒரு இயக்கப் பிழையை கண்டுபிடித்திருக்கிறார். எவ்வளவோ தேடி பார்த்தேன் அந்த பழைய லிங்க் கிடைக்கவில்லை. ஒருவேளை நீக்கிவிட்டாரோ என்னவோ. அதாவது ரெட் சிப்பை சிட்டிக்கு செலுத்தும்போது ஒரு வசனம் பேசுவார் வில்லன். பின்னர் க்ளைமாக்ஸ் கோர்ட் காட்சியில் சிட்டி தனது மெமரியில் இருந்து அதே காட்சியை ஒளிபரப்பி காட்டும். ஆனால் இந்த முறை வில்லன் வசனத்தை வேறுவிதமாக சொல்லுவார். எப்படியெல்லாம் ஆராய்ச்சி பண்ணுறாங்க பாருங்க.

என்றும் அன்புடன்,

N.R.PRABHAKARAN