2011ல் நான் எதிர்பார்க்கும் தமிழ்ப்படங்கள் – பாகம் 2

வணக்கம் மக்களே...

இந்த ஆண்டில் நான் மிகுந்த ஆவலுடன் எதிர்பார்க்கும் சில படங்கள் குறித்த பதிவு இது. பதிவின் முதல் பாகத்தை (பத்திலிருந்து ஆறாவது இடம்வரை பிடித்திருக்கும் படங்கள்) படிக்க கீழே கொடுத்துள்ள இணைப்பை சொடுக்கவும்...

2011ல் நான் எதிர்பார்க்கும் தமிழ்ப்படங்கள் – பாகம் 1

இப்போது முதல் ஐந்து இடங்களை பிடித்திருக்கும் படங்களை பார்ப்போம்...

5. நண்பன் (மூன்று முட்டாள்கள்)

3 இடியட்ஸ் படத்தின் தமிழ் ரீமேக். விஜய் நடிக்க இருக்கிறார் என்று சொல்லப்பட்டு இப்போது சூர்யா என்று சொல்லப்படுகிறது. இணையான வேடங்களில் ஜீவா, ஸ்ரீகாந்த். படம் ஷங்கரின் இயக்கத்தில் வர இருக்கிறது என்பதே அதி முக்கியமான விஷயம். முக்கிய கதாப்பாத்திரம் ஒன்றில் சத்யராஜ் நடிக்க இருப்பதாக தெரிகிறது. மீண்டும் தமிழில் இடுப்பழகி இலியானா. இந்தமுறையாவது இலியானாவின் கோலிவுட் பிரவேசம் இனிப்பாக அமையட்டும்.

4. மங்காத்தா

“தல” படம் என்ற ஒருவரியைத் தவிர வேறு எதுவும் தேவையில்லை என்பதே எனது கருத்து. இருப்பினும், நடுநிலையாக பார்த்தால் யூத்துக்களை வைத்து ஜாலியாக படமெடுத்து வந்த வெங்கட் பிரபு சீரியஸாக இறங்கியிருக்கும் முயற்சி. அஜித், அர்ஜுன், பிரேம்ஜி, வைபவ், கணேஷ் வெங்கட்ராமன் என்று ஹிந்தி பட ஸ்டைலில் நட்சத்திர பட்டாளம் நடிப்பது நல்ல விஷயம். கிளிகளுக்கும் பஞ்சமில்லை. த்ரிஷா, சினேகா, லட்சுமி ராய், சோனா என்று ஒரு கூட்டமே இருக்கிறது. யுவனின் இசை படத்திற்கு பலம் சேர்க்கும் என்பதில் ஐயமில்லை.

பில்லா – 2

தல நடிப்பில் சூப்பர்ஹிட்டான பில்லா படத்தின் இரண்டாம் பாகம். முதல் பாகத்தை இயக்கிய அதே விஷ்ணுவர்தன் இந்தப் படத்தையும் இயக்க யுவன் இசை. எனினும் முதல் பாகத்தில் நடித்த நயன், நமீதா இந்தப் பாகத்தில் இருக்க மாட்டார்கள் என்றே எண்ணத் தோன்றுகிறது. சொல்லப்போனால் இது முதல் பாகத்து கதையின் தொடர்ச்சி அல்ல முதல் பாகத்து கதைக்கு முன்பு நடந்த சம்பவங்களை அடிப்படையாக கொண்ட கதை. ஹிந்தியில் ஷாருக் நடிக்க இருந்து பின்னர் கைவிடப்பட்ட படம்.

3. மாலை நேரத்து மயக்கம் (அ) மருவன் (அ) இரண்டாம் உலகம்

எனக்கு மிகவும் பிடித்த இயக்குனரான செல்வராகவன் இயக்கி தனுஷ் நடிப்பில் வெளிவர இருக்கும் படம். மேலும் எனது கனவுக்கன்னி லிஸ்டில் இருந்த ஆண்ட்ரியா நாயகியாக நடிக்கிறார். ஒரு கணவனுக்கும் மனைவிக்கும் இடையில் நடக்கும் உணர்ச்சிப் போராட்டங்களே கதை என்று சொல்லப்படுகிறது. இதற்கு முன்பு கார்த்தி – சந்தியா நடிப்பதாக இருந்து பின்னர் கைவிடப்பட்ட படம் இப்போது புதிய தலைப்போடு தொடங்க இருக்கிறது (தற்போதைய தலைப்பு: இரண்டாம் உலகம்).

சிந்துபாத்

மறுபடியும் ஒரு செல்வராகவன் படம். விக்ரம் நாயகியாகவும் “சுப்ரமணியபுரம்” சுவாதி நாயகியாகவும் நடிக்க இருப்பதால் எதிர்ப்பார்ப்பு கூடியிருக்கிறது. ஆயிரத்தில் ஒருவன் படத்திற்கு இசையமைத்த ஜி.வி.பிரகாஷ் மீண்டும் செல்வராகவனுடன் கை கோர்க்கிறார். மீண்டும் செல்வராகவனிடம் இருந்து ஒரு சைக்கோ திரில்லர் என்பது மட்டும் கொஞ்சம் சலிப்பூட்டுகிறது.

2. நடுநிசி நாய்கள்

கெளதம் மேனன் இயக்கத்தில் வெளிவர இருக்கும் திரில்லர் படம். கால் செண்டர் வாழ்க்கை குறித்த படம் என்பதால் எக்கச்சக்கமாக எதிர்பார்க்கிறேன். படத்தில் பாடல்களும் இசையும் எள்ளளவும் கிடையாது என்பது ஆச்சர்யமான உண்மை. நாயகியாக சமீரா ரெட்டி. நாயகன் புதுமுகம் என்றே தெரிகிறது இருப்பினும் கெளரவ தோற்றத்தில் சூர்யா (எத்தனை படத்தில்தான் கெளரவத் தோற்றத்தில் வருவாரோ)

1. அரவாண்

அங்காடித் தெரு என்ற அருமையான படைப்பை தந்த வசந்த பாலனின் அடுத்த படம். படத்தின் போட்டோ ஷூட் மிரள வைக்கிறது. பதினெட்டாம் நூற்றாண்டு சம்பவங்களை அடிப்படையாக கொண்ட பீரியட் படம். “மிருகம் மற்றும் ஈரம்” புகழ் ஆதியும், பசுபதியும் முக்கிய வேடங்களில் நடிக்கிறார்கள். மேலும் என்னுடைய கனவுக்கன்னி தன்ஷிகா நாயகியாக வித்தியாசமான தோற்றத்தில் நடிக்கிறார்.

டிஸ்கி 1: பதிவின் முதல் பாகத்தில் முதலிடம் பிடித்திருக்கும் படத்தை யூகிக்கும் படி சொல்லியிருந்தேன். அதைச் சரியாக யூகித்த ஐத்ரூஸ் மற்றும் Tamil World இருவருக்கும் சேரனின் "டூரிங் டாக்கீஸ்", வடிவேலுவின் "வடி வடிவேலு... வெடிவேலு..." மின்-புத்தகங்கள் மெயில் மூலம் இன்று இருவருக்குள் அனுப்பப்படும்... அவர்கள் இருவரும் தத்தம் மெயில் ஐடிக்களை தெரிவிக்கும்படி கேட்டுக்கொள்கிறேன்...

என்றும் அன்புடன்,

N.R.PRABHAKARAN