மகாராணியும் மன்மதராஜாவும் – Mission Cleopatra

வணக்கம் மக்களே...

வரலாற்று நாயக - நாயகிகளுள் எகிப்து ராணி கிளியோபாட்ராவை எனக்கு எந்த அளவுக்கு பிடிக்கும் என்பது எனது பழைய பதிவான “கட்டழகி கிளியோபாட்ரா” படித்தவர்களுக்கு தெரிந்திருக்கும். அப்படி என் மனம் கவர்ந்த கிளியோபாட்ராவைப் பற்றி சமீபத்தில் ஒரு திரைப்படம் வெளியாகியுள்ளது என்பது உங்களுக்குத் தெரியுமா...? கவர்ச்சிக்காக (நம்மூர் இளசுகளை ஏமாற்றுவதற்காக) “மகாராணியும் மன்மதராஜாவும்” என்ற தலைப்பில் வெளிவந்திருக்கிறது. இந்த மாதிரி தலைப்பு வைத்தால் இளைஞர்கள் எல்லாம் “அட்ராசக்க” என்று அடித்துபிடித்து ஓடிவருவார்கள் என்று நினைத்துவிட்டார்கள் போலும். நண்பர்கள் சிலரை கூப்பிட்டு அவர்கள் கிலியாக நான் தனியாகவே புறப்பட்டேன் கிளியைப் பார்ப்பதற்கு. திரையரங்கில் ஓரளவுக்கு கூட்டம் இருந்தது. நிறைய பேர் போஸ்டரில் “இளமை + கலக்கல்” என்று போட்டிருந்ததை பார்த்து வந்திருக்கிறார்கள் என்பது அவர்களது மொகரக்கட்டையை பார்த்தபோதே தெரிந்தது. ஓகே தியேட்டர் கதவை திறந்திட்டாங்க... வாங்க உள்ளே போவோம்...

Title: Astérix & Obélix: Mission Cléopâtre

Country: France, Belgium

Language: French

Year: 2002

Genre: Adventure, Fantasy, Comedy

Cast: Monica Bellucci, Gérard Depardieu, Christian Clavier

Director: Alain Chabat

Producer: Claude Berri

Cinematographer: Laurent Dailland

Editor: Stéphane Pereira

Music: Philippe Chany

Length: 107 Minutes

இந்தப்படம் எகிப்து நாட்டில் நடந்த ஒரு வரலாற்றுச் சம்பவத்தை மையமாக வைத்து நகைச்சுவையாக எடுக்கப்பட்டுள்ளது. ஒரு முறை ஜூலியஸ் சீசருக்கும் கிளியோபாட்ராவுக்கும் ஒரு வாக்குவாதம் ஏற்படுகிறது. திறமையில் சிறந்தவர்கள் ரோமானியர்களே என்று சீசர் மார்தட்ட, கிளி சூடாகி நீங்களே பார்த்து வியக்கும் வகையில் எகிப்தியர்கள் இன்னும் மூன்றே மாதங்களில் பிரம்மாண்ட மாளிகை ஒன்றை கட்டிமுடிப்பார்கள் என்று சவால் விடுகிறார். ஆனால் மூன்று மாதத்தில் மாளிகையை கட்டுவது சாத்தியமா என்ன...? மாளிகையை புதுமையாக கட்டும் நோக்கில் வழக்கமாக அரசு பணியில் ஈடுபடும் கலைஞனை தவிர்த்து வேறொரு கட்டிடகலைஞனிடம் பொறுப்பு ஒப்படைக்கப்படுகிறது. மூன்று மாதங்களில் மாளிகை கட்டமுடியாது என்று உணர்ந்த கட்டிடகலைஞன் அவனது நண்பர்களான ஜெடாபிக்ஸ், அஸ்ட்ரிக்ஸ் மற்றும் ஒபெளிக்ஸ் ஆகியோரை நாடுகிறான். அவர்களிடம் அபார சக்தி தரும் மந்திரப்பானம் ஒன்று இருக்கிறது. அதன்மூலம் மாளிகை குறிக்கோளை நோக்கி பயணிக்கிறார்கள். இந்நிலையில் அரசின் வழக்கமான கட்டிடகலைஞனும் ரோமப் பேரரசு ஜூலியஸ் சீசரும் இவர்களின் லட்சியத்திற்கு தடையாக இருக்கிறார்கள். அந்த தடையை மீறி மாளிகையை கட்டி முடித்தார்களா என்பதே மீதிக்கதை.

இந்தப்படம் காமிக்ஸ் ஒன்றை தழுவி எடுக்கப்பட்டது. மேலும் படத்தில் கிளியோபாட்ராவை விட அஸ்ட்ரிக்ஸ் மற்றும் ஒபெளிக்ஸ் என்ற இரண்டு பாத்திரங்களுக்கு அதிக முக்கியத்துவம் கொடுக்கப்பட்டுள்ளது. இவர்கள் இருவரும் யாரென்று ஆராய்ந்து பார்த்தால் இவர்கள் லாரல் – ஹார்டி போன்றதொரு இணை, ஆனால் கற்பனை பாத்திரங்கள். நம்மூர் கவுண்டமணி – செந்தில் மாதிரி என்றுகூட சொல்லலாம். ஆனா கவுண்டமணி – செந்தில் அளவுக்கு எல்லாம் யாராவது நம்மை சிரிக்க வைக்க முடியுமா என்ன...? இந்த பாத்திரங்களை வைத்து உலக அளவில் நிறைய படங்களை எடுத்திருக்கிறார்கள் அவற்றில் இதுவும் ஒன்று. இந்தப்படத்தில் Gérard Depardieu, Christian Clavier என்று இரண்டு நடிகர்கள் அந்தப் பாத்திரங்களை ஏற்று நடித்திருக்கிறார்கள்.

படத்தில் கிளியோபாட்ராவாக நடித்திருப்பவர் மோனிகா பெளுசி எனும் நடிகை. அட ஆமாங்க... அவங்களேதான். இவங்கதான் சோனியா காந்தி வேடத்தில் நடிக்க இருப்பதாக சொல்லப்பட்டது. கிளியோபாட்ரா வேடத்தில் நடிக்குமளவிற்கு பேரழகி என்றெல்லாம் சொல்ல முடியாது. ஆனால் முகத்தில் திமிர் காட்டுவதில் வெற்றி பெற்றிருக்கிறார்.

கிளியோபாட்ராவை விட அவரது பணிப்பெண்ணாக நடித்திருப்பவர்களுள் ஒருவரான Noémie Lenoir செம க்யூட். பேசாமல் அவரையே கிளியோபாட்(ராவாக) போட்டிருக்கலாம். கிளியோபாட்ரா கருப்பழகி தானே. அப்படியென்றால் இவர்தானே பொருத்தம். அவரது ஸ்டில்லை நம்ம பதிவில் இணைக்க விரும்பி கூகிளாண்டவரை வேண்டினால் ஒரே 18+ ஸ்டில்கள். சல்லடை போட்டு தேடியதில் கிடைத்த கொஞ்சம் கெளரவமான ஸ்டில் மேலே இருப்பதுதான்.

கடைசி நொடிவரை சீட்டை விட்டு எழுந்திருக்காமல் பார்த்துவிட்டேன். படத்தில் ஒரு சின்ன பிட்டு கூட இல்லை. இறுதிக்காட்சியில் சீசருக்கும் கிளியோபாட்ராவுக்கும் இடையே ஏற்படும் முத்தச்சத்தத்தை தவிர்த்துவிட்டால் இந்தப்படம் குழந்தைகுட்டிகளோடு சென்று குதூகலமாக பார்க்க வேண்டிய திரைப்படம். இந்தப்படத்தை இந்த மாதிரி விளம்பரப்படுத்தியதற்கு பதிலாக “கிளியோபாட்ரா” என்று பெயரை காட்டி ஒரு வரலாற்றுப்படமாக முன்னிலை படுத்தியிருந்தால் இன்னும்கூட அதிக வரவேற்பு பெற்றிருக்கும்.

டிஸ்கி 1: பதிவிறக்க லிங்குகள் எவ்வளவு தேடியும் கிடைக்கவில்லை. பர்மா பஜாராய நமஹ...

டிஸ்கி 2: அவசர அவசரமாக எழுதி வெளியிடப்பட்ட பதிவு... எழுத்துப்பிழைகள், எண்ணப்பிழைகள் ஏதேனும் இருந்தால் தயங்காமல் தெரிவியுங்கள்.

டிஸ்கி 3: அவசர அவசரமாக எழுதியதன் காரணம், திரையரங்குகளில் படம் இன்றே கடைசி... முந்துங்கள்...

டிஸ்கி 4: நேற்றைய பதிவு ஹிட் ஆக இன்னும் சில வாக்குகளே தேவைப்படுகின்றன... கொஞ்சம் அதையும் கவனிச்சிட்டு போங்க:- "சிறுத்தை சீறுமா...?"

டிஸ்கி 5: வலைப்பூவின் ஓரமாக இருக்கும் "பொங்கல் ரேசில் ஜெயிக்கப்போவது...?" கருத்துக்கணிப்பு ஜோதியில் நீங்களும் ஐக்கியமாகுங்க... (இன்றே கடைசி நாள்)

என்றும் அன்புடன்,

N.R.PRABHAKARAN