தமிழ்மணத்திற்கு வந்த சோதனை

அன்புள்ள வலைப்பூவிற்கு,

தமிழில் வலைப்பூ எழுதும் நம்மில் பெரும்பான்மையானவர்களுக்கு முகவரி கொடுத்த இணைய முகவரி: http://tamilmanam.net/ அது மட்டுமல்லாமல் தமிழ் படைப்புகளை தேடிப்படிக்கும் வாசகர்கள் பலர் நாடி வருவதும் தமிழ்மணமே. பதிவுலகத்தை உயரியதொரு இடத்திற்கு கொண்டு சென்றதில் தமிழ்மணத்திற்கு முக்கிய பங்கு உண்டு. மேலும், பதிவர்களுக்கிடேயே தர வரிசை, பதிவர்களுக்காக விருதுகள் என்று பதிவர்களை பெருமளவில் ஊக்குவிப்பதில் (!!!) அவர்களுக்கு நிகர் யாருமில்லை. (சரி போதும் மொக்கை போடாம மேட்டருக்கு வா...)

இந்நிலையில் சமீபகாலமாகவே, அதாவது சுமார் ஒரு வருடமாகவே தமிழ்மணம் அவ்வப்போது இக்கட்டான சூழ்நிலைகளில் அல்லல்படுகிறது. குறிப்பாக பதிவர்களுக்கான தர வரிசை ஆரம்பித்ததில் இருந்தே பிரச்சனை ஆரம்பித்துவிட்டது. பல நேரங்களில் முன் அறிவிப்பின்றி விடுப்பு எடுக்கும் பணியாளனைப்போல படுத்த படுக்கை ஆகிவிடும். அத்தகைய சமயங்களில் நம்முடைய வலைப்பூவை மற்றவர்கள் திறக்கவும் முடியாது, நாமும் மற்றவர்களின் வலைப்பூவை திறக்க முடியாது.

வெறுமனே லிங்கை மட்டும் கிளிக்கினால் மைனஸ் ஓட்டு விழுகிறது என்றொருமுறை பிரச்சனை வெடிக்க, பின்னர் ஒவ்வொரு முறை வாக்கிடும்போதும் பயனர் பெயர், கடவுச்சொல் கேட்கும் நடைமுறை கொண்டுவரப்பட்டது. இதன் காரணமாக சிக்கல் தீர்ந்தாலும் ஓட்டு போடுவது சுலபமாக இல்லை என்பதொரு வருத்தமே.

2011ம் ஆண்டு ஆரம்பமானபின்பு தமிழ்மணம் பலரது கண்களுக்கும் பழைய மனைவியாக தெரிய ஆரம்பித்தாள். எப்படி ஆர்குட் போய் பேஸ்புக் வந்ததோ அதே போல தமிழ்மணமும் நம்மிடமிருந்து நாளுக்கு நாள் விலகிக்கொண்டிருந்தது. இதற்கிடையில் பதிவர்களும் பஸ் ஓட்ட ஆரம்பித்தனர் என்பது வேறு கதை. ஜனவரி மாத ஆரம்பத்தில் சுமார் 19,000 அருகில் இருந்த தமிழ்மணத்தின் அலெக்ஸா மதிப்பீடு தற்போது 26,000 அருகில் உள்ளது.

தமிழ்மணம் கிட்டத்தட்ட செயல் இழந்துவிட்டது என்ற வரிகளை தமிழ்மணமே வெளியிட்டபோது கொஞ்சம் வேதனையாகத்தான் இருந்தது. ஆனால் சில வாரங்களில் தமிழ்மணம் இயல்புநிலைக்கு திரும்பிவிடும் என்றும் தமிழ்மணத்தின் சேவைகள் சிறந்தமுறையில் தொடர நன்கொடை கேட்டும் வந்த அறிவிப்பு நம்மை ஆறுதல்படுத்தியது. அவர்கள் அறிவித்தபடி தமிழ்மணம் ஓரளவு தனது இயல்புநிலைக்கு திரும்பிவிட்டது என்றே சொல்லலாம்.

தமிழ்மணம் புதுப்பொலிவுடன் இன்னும் இன்னும் அதிக பலத்துடன் மீண்டு வரும் என்று நாமெல்லாம் நம்பிக்கொண்டிருக்கும் வேளையில் தமிழ்மணத்தின் மீது பெரிய இடி விழுந்திருக்கிறது. யாரோ பிலாசபி பிரபாகரன்னு ஒரு பதிவனாம். அவன்தான் தமிழ்மணத்தின் இந்த வார நட்சத்திரமாம். நாளைக்கு ஆரம்பித்து 15ம் தேதி வரைக்கும் தினம் ஓரிரு பதிவுகளை எழுதி கொல்வானாம். ம்ஹூம்... வெளங்கிடும்ன்னு நீங்க சொல்வது கேட்கிறது. என்ன செய்வது தமிழ்மணத்திற்கு புரியனுமே.

டிஸ்கி: தமிழ்மண நட்சத்திர வாரத்தை கணக்கில் கொண்டு பின்னூட்ட மட்டறுப்பை தற்காலிகமாக நீக்குகிறேன். அனானி அண்ணன்மார்களே இன்னும் ஒருவாரத்திற்கு எந்த தொந்தரவும் செய்ய வேண்டாமென்று உங்களிடம் இருகரம் கூப்பியும், மண்டியிட்டும் கேட்டுக்கொள்கிறேன். நீங்கள் கெட்டவார்த்தையில் திட்டினாலும் பரவாயில்லை ஆனால் ஒரே பின்னூட்டத்தை 100, 200 முறை காப்பி பேஸ்ட் செய்து தொல்லை கொடுக்காதீர்கள். இதையும் மீறி யாராவது கோபத்தை வெளிப்படுத்த விரும்பினால் mail id: nrflyingtaurus@gmail.com & phone number: +91-8015899828.

-     என்றும் அன்புடன்,

N.R.PRABHAKARAN