தெகிடி

அன்புள்ள வலைப்பூவிற்கு,

நிகழ்வாரத்தில் நான்கைந்து லோ-பட்ஜெட் படங்கள் வெளிவந்திருப்பது போல தெரிகிறது. எனக்கும் கடல்லயே இல்லாத ‘மீன்’ கிடைத்திருப்பதால் ஏதாவதொன்றை பார்த்துவிடும் நோக்கத்தோடு செய்தித்தாளை புரட்டினேன். பனிவிழும் மலர்வனம் என்றொரு படம். போஸ்டரை பார்த்ததும் முதலில் லைப் ஆஃப பையை தமிழில் மொழிபெயர்த்து வெளியிடுகிறார்கள் என்று நினைத்துவிட்டேன். அதையே தேர்ந்தெடுத்துவிடலாம் என கிட்டத்தட்ட முடிவெடுத்துவிட்ட நிலையில் நல்லவேளையாக தெகிடி ட்ரைலர் பார்த்தேன். அந்த கணமே தெகிடியை பார்த்துவிடுவதென்று தீர்மானித்துவிட்டேன்.

அசோக் செல்வனுக்கு உளவு வேலை பார்ப்பதில் பேரார்வம். சென்னையில் ஒரு துப்பறியும் நிறுவனத்தில் பணிக்கு சேர்கிறார். நிறுவனம் சார்பாக சில மனிதர்களை பற்றி தகவல் சேகரித்து தருகிறார். நிறுவனம் ஜனனியை உளவு பார்க்கச் சொல்கிறது. ஆனால் அசோக் ஜனனியை காதலிக்கத் துவங்கிவிடுகிறார், ஜனனியும். மறுபுறம், அசோக் உளவு பார்த்த நபர்கள் ஒவ்வொருவராக விபத்தில் இறக்கிறார்கள். அவை கொலை என்று அசோக் கண்டுபிடிக்கிறான். அப்படியென்றால் ஜனனியின் கதி என்ன...? யார், எதற்காக கொலை செய்கிறார்கள்...? என்பதே மீதிக்கதை.

அசோக் செல்வனுடைய வளர்ச்சி கவனிக்கத்தக்கது. மனிதர் ஆரம்பத்தில் சிறுசிறு வாய்ப்புகளை தேடியலைந்திருக்கிறார். நல்லவேளையாக அவருக்கு அப்படிப்பட்ட வேடங்கள் அதிகம் கிடைக்கவில்லை. நலன் குமாரசாமியின் சூது கவ்வும் படத்தில் வாய்ப்பு கிடைத்து, தற்சமயம் கதாநாயக அந்தஸ்து பெற்றுவிட்டார். ஒருவேளை அவர் கதைகளை கவனமாக தேர்ந்தெடுக்கிறார் என்றால் வாழ்த்துகள். தொடர்ந்து அதையே செய்யுங்கள். தற்செயலாக அமைந்ததென்றால் கவலை வேண்டாம், சரியான பாதையில் போய்க் கொண்டிருக்கிறீர்கள். தெகிடியில் அசோக் செல்வனுக்கு ஈயம் பூசியும் பூசாதது போல ஹீரோயிசம் உள்ள வேடம். ஒரு காட்சியில் ஜெயபிரகாஷை முன்னே விட்டு பின்னால் அசோக் வருகிறபோது அரங்கத்தில் விசில் சத்தத்தை கேட்க முடிந்தது. ரசிகைகளை பெற்றுத் தரக்கூடிய முகம் வாய்த்திருக்கிறது அசோக் செல்வனுக்கு. சரியான வாய்ப்புகளை பயன்படுத்திக்கொண்டால் அஜித் அளவிற்கு உயரம் தொடலாம்.

கதாநாயகி ஜனனி அய்யர் – அய்யய்யேர் ! சாமிகளா... உங்களுக்கு கோடம்பாக்கத்தில் வேறு கதாநாயகியே கிடைக்கவில்லையா...? படத்தில் ஜனனிக்கு சிறிய அளவிலான வேடம்தான். முதல் பாதியில் ஒருசில காட்சிகள், கொஞ்சம் காதல், இரண்டாம் பாதியில் அவ்வப்போது தலை காட்டுகிறார், அப்புறம் வழக்கம்போல கிளைமாக்ஸ், அவ்வளவுதான். இதைச் செய்ய ஜூனியர் ஆர்டிஸ்டுகள் யாரையாவது நடிக்க வைத்திருந்தால் கூட நான் வருத்தப்பட்டிருக்க மாட்டேன். உண்மையில் ஜனனியுடைய வேடம் சில இடங்களில் ரசிக்கக்கூடியது. ஒரு காட்சியில், நீங்க சின்னச்சின்ன விஷயத்துக்கெல்லாம் ஃபீல் பண்ணுவீங்களா’ன்னு அசோக் கேட்கிறார். அதற்கு ஜனனி, வாழ்க்கை ரொம்ப சின்னது. அதில் சின்னச் சின்ன விஷயங்களையெல்லாம் ரசிக்கணும் என்கிறார். ஆனால் அதைச் சொல்வது சிறிய அளவில் கூட ரசிக்க முடியாத ஜனனி என்பதைத்தான் ஏற்றுக்கொள்ள முடியவில்லை. குறைந்தபட்சம் க்ளோஸப் காட்சிகளையாவது தவிர்த்திருக்கலாம். ப்ச்...!

சினிமா விருது விழாக்களில் சப்போர்டிங் ரோல் என்று ஒன்றைச் சொல்வார்களே அந்த பதத்திற்கு பொருத்தமான வேடத்தில் காளி (அசோக்கின் நண்பராக நடித்திருப்பவர்). மேலோட்டமாக பார்க்கும்போது சாதாரண வேடம் போல தெரியும் இவர் மட்டும் இல்லையென்றால் இயக்குநர் திணறியிருக்கக்கூடும். பல காட்சிகளில் நாயகனுக்கும், பார்வையாளர்களுக்கும் இடையேயான உரையாடல் காளியின் ஊடாக நடைபெறுகின்றன. வில்லாவில் நண்பராக வரும் ராஜேஷை போல அல்லாமல் தேவைக்கேற்ப நடித்திருக்கிறார். சைலேஷ் வேடத்திற்கு புரஃபெஷனல் தோற்றம் கொண்ட வேறு யாரையாவது நடிக்க வைத்திருக்கலாம். ஜனனியின் தோழியாக வரும் அந்த கருப்பழகி கவனிக்கப்பட வேண்டியவர்.

பாடல்களில் யார் எழுதியதோ, விண்மீன் விழிகள் இரண்டும் ஹிட்டடிக்கும். மற்றவை அவ்வளவாக ஈர்க்கவில்லை. எல்லா பாடல்களும் ஏறத்தாழ ஒரே சாயலில் இருப்பது போல தோன்றுகிறது. முடிவாக, அறிமுக இசையமைப்பாளர் நிவாஸ் பிரசன்னா குப்பனோ சுப்பனோ இல்லை என்பது மட்டும் நிச்சயம். ஜெயகுமாருக்கும் அசோக்குக்கும் இடையே நடைபெறும் ஒரு சிறிய சண்டைக்காட்சி நேர்த்தியாக அமைந்திருந்தது. 

படத்தின் டைட்டிலை என்னால் சுலபமாக ஏற்றுக்கொள்ள முடியவில்லை. தெகிடி என்றால் சூது என்று அகராதியில் தேடி கண்டுபிடித்தேன். இருக்கட்டும். ஒரு நல்ல தமிழ் பெயரை தேடியெடுத்து சூட்டியமைக்காகவும், எங்களுக்கு அறிமுகப்படுத்தியதற்காகவும் பாராட்டுகள். ஆனால் அந்த டைட்டிலே படத்திற்கு வரவேண்டிய கூட்டத்தை குறைத்திருப்பது அசம்பாவிதமானது. யாரிடமாவது தெகிடி என்று சொன்னால் தமிழ் படமா என்றுதான் முதலில் கேட்கிறார்கள். சமூக வலைதளங்களில் நிறைய பேர் தெகிடி என்றால் என்னவென்று கேட்டுத் தெரிந்துகொள்வது மகிழ்ச்சியான விஷயம்தான். ஆனால் அவர்கள் கேட்டுத் தெரிந்துகொண்டு படம் பார்க்க வருவதற்குள் அடுத்த வார படங்கள் வெளியாகியிருக்கும். இயக்குநர் ரமேஷ் அடுத்த படத்திற்கு பெயர் சூட்டும்போது கவனத்தில் கொள்ளவும்.

படத்திற்கு பெரிய அளவில் விளம்பரம் செய்ததாக தெரியவில்லை. அதுவே கூட ஒரு பலம்தான். அதிக எதிர்பார்ப்பில்லாமல் பார்த்ததும் தெகிடியை பிடித்துவிடுகிறது. ஆங்கிலத்தில் வெளிவரும் ஷெர்லாக் ஹோம்ஸ் பாணி என்கிறார்கள். நான் ஷெர்லாக் ஹோம்செல்லாம் பார்த்ததில்லை. என்னளவில், இரண்டு மணி நேர படம். அதில் நடுவே எந்த இடத்திலும் தொய்வில்லாமல் விறுவிறுவென போகிறது என்ற வகையிலும் தமிழில் சமீபத்தில் அதிகம் வெளிவராத ‘க்ரைம் மிஸ்ட்ரி’ வகையறா என்பதாலும் பிடித்துவிட்டது. க்ளைமாக்ஸில் ட்விஸ்ட் வேண்டிய கட்டாயத்தில் வைக்கப்பட்டுள்ள காட்சி சற்று சலிப்பை ஏற்படுத்தியது உண்மைதான். அது சற்று எளிதாக கண்டுபிடிக்கக்கூடிய ட்விஸ்டும் கூட. எனினும் ஒட்டுமொத்தமாக பார்க்கும்போது தெகிடி தமிழ் சினிமா ரசிகர்கள் தவறவிடக்கூடாத படம்...!

என்றும் அன்புடன்,

N.R.PRABHAKARAN

Post Comment

பிரபா ஒயின்ஷாப் – 17022014

அன்புள்ள வலைப்பூவிற்கு,

புத்தகக்காட்சியில் நித்தியானந்தா கடையில் நுழைந்து ஆனந்த கீர்த்தன் என்ற ஒலிநாடா வேண்டுமென கேட்டு, அவர்கள் ஒரு கொட்டையை கொடுத்து அனுப்பியதை எழுதியிருந்தேன். அதன் தொடர்ச்சி. அடுத்த வாரம் சொல்லி வைத்திருந்த ஒலிநாடா வந்துவிட்டதா என்று கேட்பதற்காக சென்றிருந்தேன். ம்ஹூம் கிடைக்கவில்லை. அதற்கு பதிலாக இன்னொரு கொட்டையையும் கொடுக்க முயற்சித்தார்கள். அய்யா, போன வாரமே வாங்கியாயிற்று என்று சொல்லி தப்பித்துவிட்டேன். என்று நினைத்துக்கொண்டிருந்தேன். ஆனால் அவர்கள் என்னை விடமாட்டார்கள் போல. சென்ற வாரத்தில் ஒரு தொலைபேசி அழைப்பு வந்தது. நித்தியானந்தா ஆசிரமத்திலிருந்து பேசுறோம் என்றது ஒரு அம்மையார் குரல். வார்த்தைக்கு வார்த்தை அடியேனை அய்யா என்று விளித்தார். ஏற்கனவே அவர்களிடம் என்னுடைய முகவரி கொடுத்திருந்தேன். அதை வைத்துக்கொண்டு அய்யா, திருவான்மியூரில் வகுப்பு நடக்குது. வந்தீங்கன்னா வகுப்பில் கலந்துக்கிட்டு சிடியையும் வாங்கிட்டு போயிடலாம் என்றார். என்ன வகுப்பு என்று தெரியவில்லை. அம்மாடி நான் வசிப்பது திருவான்மியூர் அல்ல, திருவொற்றியூர். அது தெற்கு, இது வடக்கு என்று சொல்லி புரியவைத்தேன். அப்படியும் அம்மையார் விடுவதாக இல்லை. விரைவில் மணலியில் வகுப்பு நடைபெற இருப்பதாகச் சொல்லி கலந்துகொள்ள பணித்திருக்கிறார். பேசாமல் ஒரு எட்டு போய்தான் பார்த்துவிடலாமா என்றுகூட தோன்றுகிறது. நகிர்தனா திரனனா னா...!

*

ஐ.பி.எல் ஜூது ஏலத்தை பார்த்து கடுப்பாகிவிட்டது. நிறைய நல்ல வீரர்களை யாரும் கண்டுகொண்டதாக தெரியவில்லை. அரசியல் காரணங்களுக்காக பாகிஸ்தானை ஆட்டத்தில் சேர்த்துக்கொள்வதே இல்லை. சென்றமுறை நிகழ்ந்த கூத்துகளுக்காக இலங்கை வீரர்களை யாரும் பெரிதாக சீண்டவில்லை. இங்கிலாந்து வீரர்களை ஏன் தவிர்க்கிறார்கள் என்றுதான் புரியவில்லை. போனியாகாத வீரர்களில் Rusty Theron என்பவர் எனக்கு முக்கியமானவராக தோன்றுகிறார். அபாரமான மிதவேக பந்து வீச்சாளர். குறிப்பாக இறுதி நேரத்தில் சிறப்பாக பந்து வீசக்கூடியவர். ஏற்கனவே ஹைதரபாத் அணிக்காகவும் (டெக்கான் கிரானிக்கல் வசமிருந்தபோது), பஞ்சாப் அணிக்காகவும் விளையாடியிருக்கிறார். அசம்பாவிதமாக தெரான் ஐ.பி.எல்லில் அதிக போட்டிகளில் சோபிக்கவில்லை. இருப்பினும் சில போட்டிகளில் அபாரமாகவும், மற்ற போட்டிகளில் மோசமில்லை என்ற வகையிலும் தான் விளையாடியிருக்கிறார். தற்சமயம் கொள்ளை விலைக்கு வாங்கியிருக்கும் வெளிநாட்டு பந்து வீச்சாளர்களை விட தெரான் எவ்வளவோ பரவாயில்லை. அதே போல பேட்ஸ்மேன்களில் Richard Levi. ஏற்கனவே மும்பைக்காக விளையாடியிருக்கிறார். லெவிக்கு கிடைத்த வாய்ப்புகள் மிகவும் குறைவு. ஆனால் தென் ஆப்பிரிக்க உள்ளூர் போட்டிகளை பொறுத்தமட்டில் சிறந்த பேட்ஸ்மேன்களில் ஒருவர். தென் ஆப்பிரிக்கா அணியைப் போலவே, அதன் விளையாட்டு வீரர்களுக்கும் ராசி இல்லையோ என்னவோ...? அவரைத் தவிர்த்து Cameron White, David Hussey, Jesse Ryder போன்றவர்களும் விலை போகவில்லை. ஆசிஷ் நெஹ்ராவை சென்னை வாங்கியிருக்கிறது. ஆனால் முனாப் படேல், ஆர்.பி.சிங் போன்றவர்களை யாரும் வாங்கவில்லை. இருக்கட்டும் ப்ரீத்தி ஜிந்தா இருக்கும்வரையில் நமக்கு கவலையில்லை.

*

விஜய் டிவியில் Connexions என்றொரு நிகழ்ச்சி வாராவாரம் ஞாயிறு மதியம் ஒரு மணிக்கு ஒளிபரப்பாகிறது. நீண்ட நாட்களுக்கு பிறகு நிகழ்ச்சி ஒளிபரப்பாகும் நேரத்தை மனதில் பதிய வைத்துக்கொண்டு தவறாமல் பார்க்கிறேன். ஹண்ட் ஃபார் ஹின்ட் பாணியில் ஆனால் அதிக கஷ்டமில்லாமல் கேள்விகள் கேட்கப்படுகின்றன. முதல் சுற்றில், இரண்டு புகைப்படங்கள் காட்டப்படுகின்றன. இரண்டிற்கும் பொதுவான வார்த்தையை கண்டுபிடிக்க வேண்டும். வார்த்தை ஆங்கிலம் அல்லது தமிழ் அல்லது இரண்டும் கலந்தும் இருக்கலாம். மற்ற சுற்றுகளும் இதே போல புகைப்படங்களை வைத்து தான். முக்கியமாக நிகழ்ச்சியை தொகுத்து வழங்கும் நண்டு ஜெகன் போட்டியாளர்களை நன்றாக கலாய்த்து தள்ளுகிறார். அதே சமயம் போட்டியாளர்கள் யாராவது டென்ஷன் ஆகிவிட்டால் அந்த சூழ்நிலையை நன்றாக கையாள்கிறார். சென்ற வாரத்தில் தொலைக்காட்சி நடிகை சூசன் ஒரு போட்டியாளராக கலந்துகொண்டார். ஒரு கட்டத்தில் சூசன் துப்பட்டா அணிந்திருந்த பாங்கை ஜகன் கிண்டலடித்தார். சூசன் டென்ஷனாகி கத்த ஆரம்பித்துவிட்டார். இதுவே விஜய் டிவியின் வேறு நிகழ்ச்சியாக இருந்தால் இதையே சாக்காக வைத்து டி.ஆர்.பி ரேட்டிங்கை உயர்த்தியிருப்பார்கள். ஆனால் ஜகன் சாமர்த்தியமாக பேச்சை மாற்றி நிலைமை மோசமாவதை தவிர்த்துவிட்டார். Connexions முடிந்ததும் ஒளிபரப்பாகும் நடுவுல கொஞ்சம் டிஸ்டர்ப் பண்ணுவோம் என்ற நிகழ்ச்சியும் நன்றாக இருக்கிறது.

*

இப்போது கனெக்ஷன்ஸ் பாணியில் சில கேள்விகள்.

One by Two: இரண்டு படங்களுக்கும் பொதுவான வார்த்தையை கண்டுபிடிக்க வேண்டும்.

 

 

 

Joint Family: இரண்டு அல்லது மூன்று படங்கள் குறித்த வார்த்தைகளை சேர்த்து விடை கண்டுபிடிக்க வேண்டும்.

 

 

மொக்கையாக இருப்பின் தனிமடலுக்கு வந்து திட்டவும். நன்றாக இருந்தால் தெரியப்படுத்தவும். வாராவாரம் தொடரலாம்.

*

பிரியாணியில் இடம்பெற்ற மிஸ்ஸிஸிப்பி பாடல் தான் ரீப்பீட்டில் ஓடிக்கொண்டிருக்கிறது. ஒளி வடிவத்தில் மந்தி டக்கராக செய்த வேலையை ஒலி வடிவத்தில் ப்ரியா ஹிமேஷ் செய்திருக்கிறார். கடைசி காலத்தில் வாலி எழுதிய பாடலில் கூட வாலிபால் விளையாடியிருக்கிறார்.

என்றும் அன்புடன்,

N.R.PRABHAKARAN

Post Comment