16 July 2018

பிரபா ஒயின்ஷாப் – 16072018

அன்புள்ள வலைப்பூவிற்கு,

21வது கால்பந்து உலகக்கோப்பையை ஃபிரான்ஸ் அணி வென்றிருக்கிறது.

கால்பந்தைப் பற்றி கால் பந்து அளவுக்குக் கூட தெரியாது என்றாலும் பெரும்பாலான இந்தியர்களைப் போல உலகக்கோப்பை இறுதிப்போட்டி மட்டும் பார்க்கும் பழக்கம் என்னிடமுண்டு. 2002ம் ஆண்டு உலகக்கோப்பையில் துவங்கிய பந்தம் அது. அந்த உலகக்கோப்பையின் முதல் போட்டியிலேயே தற்போதைய சாம்பியனும், பிரதான அணியுமான ஃபிரான்ஸை வென்று அதிர்ச்சியளித்தது செனகல் என்ற குட்டி அணி. அப்போது அது பரபரப்பாக பேசப்பட்டது. இறுதிப்போட்டியில் ப்ரெஸில், ஜெர்மனி அணிகள் மோதி ப்ரெஸில் வென்றது. அதுமுதல் ப்ரெஸில் அணியின் மீது ஒரு ஈர்ப்பு ஏற்பட்டு, அதன்பிறகு ப்ரெஸில் ஒரு உலகக்கோப்பையைக் கூட வெல்லவில்லை. இம்முறை இறுதிப்போட்டி தவிர்த்து மேலும் சில போட்டிகளை பார்க்கும் சந்தர்ப்பம் கிடைத்தது (புது டிவி !).

கால்பந்து போட்டிகளைப் பொறுத்தவரையில் இரண்டு அணிகளில் ஏதேனும் ஒன்றின் மேல் அபிமானம் இருந்தாலொழிய போட்டியில் ஆர்வம் இருக்காது. இருபது பேர் சேர்ந்து ஒற்றைப் பந்தை அலைக்கழிப்பதை சுரத்தில்லாமல் பார்த்துக்கொண்டிருக்க வேண்டும். என்னதான் விளையாட்டோ, என்று அரை நொடி நேரம் கவனத்தைத் திருப்பினால் யாரேனும் ஒருவர் கோல் போட்டிருப்பார். போலவே கால்பந்தின் சுவாரஸ்யம் இரண்டு அணிகளில் யாரேனும் ஒருவர் முதல் கோல் போடும் வரைதான். அதன்பிறகு சீக்கிரத்தில் அடுத்த அணி பதில் கோல் போடவில்லை என்றால் போரடிக்கும். மாறாக, முதல் அணியே இரண்டாவது கோலையும் போட்டுவிட்டால் க்ளோஸ். அதே சமயம், நிறைய மாட்சுகளில் கடைசி சில நிமிடங்களில் கூட ஆட்டத்தின் திசை மாறி, அதுவரை அடி வாங்கிக் கொண்டிருந்த அணி வெற்றி பெறும். இரவு பதினொன்றரை மணிக்கு நடைபெற்ற நிறைய போட்டிகளை முதல் கோல் மட்டும் பார்த்துவிட்டு தூங்கி எழுந்து பார்த்தால், முதல் கோல் அடித்த அணி தோற்றிருக்கும். 

கிரிக்கெட் ரசிகர்கள் ஏதேனும் ஒரு கால்பந்து போட்டியை ஒரு பத்து நிமிடங்கள் பார்த்தால் போதும். கிரிக்கெட்டை ஏன் ஜென்டில்மேன்’ஸ் கேம் என்கிறார்கள் என்று புரியும். இரண்டு நிமிடத்திற்கு ஒருமுறை யாராவது ஒருவர் இன்னொருவரை தள்ளிவிடுகிறார். அல்லது தள்ளிவிட்டது போல கீழே விழுகிறார்கள். லேசாக எதிரணி வீரரின் கை பட்டாலே கீழே விழுந்து புழுவைப் போல துடிக்கிறார்கள். (அவ்வளவு வீக் பாடியா பாஸ் ?). பல சமயங்களில் இதுபோன்ற கை டச், கால் டச் களேபரங்களே எதிரணிக்கு பெனால்டி கிக், ஃப்ரீ கிக் போன்ற வாய்ப்புகளை வழங்கி அதன் திசையே மாறிவிடுகிறது. கிரிக்கெட்டை கவனியுங்கள். பெரும்பாலான ஆட்டக்காரர்கள் அவுட் என்று தெரிந்தால் நடுவரின் முடிவுக்காக காத்திராமல் பெவிலியன் திரும்புகிறார்கள். கால்பந்தில், முகத்தை அப்பாவியாக வைத்துக்கொண்டு நடுவரிடம் செவாலியே போல நடித்துக் காட்டுகிறார்கள். கிரிக்கெட்டில் வீரருக்கு காயம் ஏற்பட்டால் உடனடியாக போட்டி தற்காலிகமாக நிறுத்தப்படுகிறது. எதிரணி வீரர்கள் உட்பட வந்து காயம்பட்ட வீரரை கவனிக்கிறார்கள். ஒருவேளை காயத்திற்கு காரணம் இன்னொரு வீரராக இருந்தால் அவர் வருத்தம் தெரிவிக்கிறார். கால்பந்தில் ஒரு வீரருக்கு காயம் ஏற்பட்டு கீழே விழுந்தால் கூட மீதமுள்ள பத்தொன்பது வீரர்களும் நடுவர் விசில் ஒலி எழுப்பும்வரை பந்தை துரத்துவதில் தான் குறியாக இருக்கிறார்கள்.

குரோஷியாவின் மேனேஜர் தலிக் !
விளையாட்டைத் தாண்டி இந்த கால்பந்து உலகக்கோப்பையில் கவனம் ஈர்த்த நபர், குரோஷியாவின் மேனேஜர் ஸ்லாத்கோ தலிக் (த் கிடையாது). பெரும்பாலும் அணியின் மேனேஜர்கள் என்றால் டக் அவுட்டில் உக்கிரமாக இருப்பார்கள். எதிரணி கோல் அடித்துவிட்டால் குய்யோ, முறையோ என்று கத்துவதும், தங்கள் அணி கோல் அடித்துவிட்டால் ஆவேசமாக கொண்டாடுவதுமாக இருப்பார்கள். ஆனால் நம்ம குரோஷியாவின் மேனேஜரோ செம கூல். இவருடைய அணி கோலடித்தால் கூட, இந்த ஆள் நிஜமாகவே குரோஷியா மேனேஜரா அல்லது எதிரணியின் மேனேஜரா என்று சந்தேகப்படும் அளவிற்கு சாந்தம்.1991ல் யுகோஸ்லாவியாவிடமிருந்து விடுதலை பெற்ற குரோஷியா கால்பந்து உலகக்கோப்பையில் பங்கேற்பது இது ஐந்தாவது முறை. ஒருவேளை குரோஷியா வெற்றி பெற்றிருந்தால் அது வரலாற்று சிறப்புமிக்க ஒரு வெற்றியாக இருந்திருக்கும். ப்ச். ஆனால் குரோஷியாவும், தலிக்கும் மனங்களை வென்றுவிட்டார்கள். எல்லா மேனேஜர்களும் தலிக்கைப் போல சாந்தமாக இருந்துவிட்டால் நாடு சுபிட்சமாகிவிடும்.

********** 

சில படங்களின் அவுட்லுக்கைப் பார்த்தாலே ரொம்ப கேர்ளிஷ்ஷாக இருப்பதால் பார்க்க வேண்டாம் என்று தவிர்த்துவிடுவேன். உதாரணத்திற்கு, முப்பத்தியாறு வயதினிலே, இஞ்சி இடுப்பழகி போன்ற படங்கள். (விதிவிலக்காக மகளிர் மட்டும் ஓரளவுக்கு பிடித்திருந்தது). அந்த வகையில் நடிகையர் திலகம் படத்தின் மீது ஏனோ ஈர்ப்பு ஏற்படவில்லை.

துரதிர்ஷ்டவசமாக குடும்பத்தில் உள்ள மகளிரின் காரணமாக அமேஸான் ப்ரைமில் நடிகையர் திலகம் பார்க்க நேர்ந்தது. பத்து நிமிடங்களுக்குள் நாம் ஒரு தெலுங்கு படத்தைப் பார்த்துக் கொண்டிருக்கிறோம் என்பது அப்பட்டமாக தெரிந்துவிட்டது. முதலில் இந்த பை-லிங்குவல், மல்டி-லிங்குவல் படம் எடுக்கும் ஓலர்களுக்கு கோலிவுட்டில் ரெட் கார்டு போட வேண்டும். டப்பிங் படமென்றால் டப்பிங் என்று சொல்லித் தொலையுங்களேன். அது என்ன பை-லிங்குவல். கீர்த்தி சுரேஷ் தானே சாவித்திரி. சமந்தாவை ஏன் காட்டிக்கொண்டிருக்கிறார்கள் என்று நினைத்து காண்டாகும் அளவிற்கு சமந்தாவுக்கு போர்ஷன் அதிகம். ஹவ் டூ பிக்கப் கேர்ள்ஸ் என்று தெரிந்துகொள்ள விரும்புபவர்கள் இத்திரைப்படத்தின் துல்கர் சல்மான் போர்ஷனை ஒரு கட்டாய பாடமாக எடுத்துக்கொள்ளலாம்.

மற்றபடி முழுப் படத்தைப் பார்க்காமல் படத்தைப் பற்றி குறை சொல்வது தவறு என்பதால் நிறுத்திக்கொள்கிறேன்.

என்றும் அன்புடன்,
N.R.PRABHAKARAN

Post Comment

9 July 2018

பிரபா ஒயின்ஷாப் – 09072018

அன்புள்ள வலைப்பூவிற்கு,

சரியாக முத்த தினத்தின்போது முத்தத்தைப் பற்றி மரு.நாராயண ரெட்டியின் டூயட் கிளினிக்கில் படித்துக்கொண்டிருந்தேன்.

மரு.ரெட்டி முத்தத்தை ஒரு மீடியம் என்கிறார். முத்தத்தின் வழியே ஒருவருடைய மணம், சுவை, ஸ்பரிசம் மூன்றும் ஒருவரிடமிருந்து இன்னொருவருக்கு கடத்தப்படுகிறது. முக்கியமாக உணர்வுகள் கடத்தப்படுகின்றன. முத்தத்தால் அன்பு, பாசம், காதல், செக்ஸ், மரியாதை போன்ற உணர்வுகளை வேறுபடுத்திக் காட்ட இயலும். யார், யாரை முத்தமிடுகிறார் என்பதைப் பொறுத்து உணர்வுகள் மாறும். உதாரணத்திற்கு, அஜித் ஈஷா பேபியை நெற்றியில் முத்தமிட்டால் அது பாசம். அதே அஜித் காஜல் அகர்வாலை நெற்றியில் முத்தமிட்டால் அது காதல்.

காமசூத்ராவில் முத்தத்தைப் பற்றி ஒரு அத்தியாயமே இருப்பதாகவும், அதில் பல வகை முத்தங்களைப் பற்றியும் எழுதியிருப்பதாக ரெட்டி சொல்கிறார். அவற்றிலிருந்து சிலவற்றைப் பார்க்கலாம்.

பெயரளவு முத்தம்: பெண் அதிகம் பங்கெடுக்காமல், அதே சமயம் துணையை தன் உதடுகளில் மென்மையான முத்தம் பதிப்பதை அனுமதித்தல்.

துடிப்பான முத்தம்: பெண் தனது இணையின் உதடுகளை அனுமதிக்கும் பொருட்டு தன் உதடுகளை மெல்லப் பிரித்து, துணை முத்தமிடும் சமயத்தில் தன் கீழுதடுகளை இயக்குவது.

சாய் முத்தம்: வியாழக்கிழமைகளில் சாய் பாபா பக்தர்கள் கொடுத்துக் கொள்ளும் முத்தம் என்று நினைத்துக்கொள்ளப் போகிறீர்கள். முத்தமிடுபவர்கள் இருவரும் தங்கள் தலைகளை எதிரெதிர் திசையில் சாய்த்து முத்தமிட்டுக்கொள்வது. பெரும்பாலான தமிழ் சினிமாக்களில் ஹீரோவும் ஹீரோயினும் இப்படித்தான் முத்தமிட்டுக் கொள்வார்கள் (கேமரா பொடனியில்).

வளை முத்தம்: துணையின் கழுத்தை அண்ணாந்து பார்க்குமாறு சாய்த்து, துணையின் கன்னத்தையோ தாடையையோ பிடித்தபடி லேசாக குனிந்து முத்தமிட்டுக்கொள்வது.

நேரடி முத்தம்: இருவரும் பேதமின்றி ஒரு பழத்தை சுவைக்கும் நோக்கத்தில் ஒருவர் உதடுகளை இன்னொருவர் சிறுகச் சிறுக கொறித்து, உறிந்து முத்தமிட்டுக் கொள்வது.

அழுத்த முத்தம்: கொஞ்சம் வன்மையான முத்தம். ஒருவர் தன் உதடுகளை மூடியிருக்க, இன்னொருவர் தன் பற்களால் மெல்ல அவருடைய உதடுகளை அதிக வலி ஏற்படுத்தாமல் கடிப்பது. அதற்காக வடிவேலு ஒரு படத்தில் தன் இணைக்கு கொடுப்பது போல ரத்தமயம் ஆக்கி வைக்கக்கூடாது.

பூட்டு முத்தம்: ஒருவர் தன்னுடைய உதடுகளால் துணையின் மேலுதட்டை கவ்வ, அதே சமயம் அத்துணை முத்தம் கொடுப்பவருடைய கீழுதட்டை கவ்வி சுவைப்பது.

சண்டை முத்தம்: இருவரும் ஒருவரை ஒருவர் பற்களை, ஈறுகளை, அன்னத்தை, நாக்கை தொட்டுக்கொண்டு மென்மையாக சண்டை போடுதல்.

இதுபோல காமசூத்ராவில் மொத்தம் இருபதுக்கும் மேலான முத்த வகைகள் குறிப்பிடப்பட்டுள்ளன. முத்தத்தில் மொத்தமே இவ்வளவுதான் வகைகள் இருக்கின்றன என்று அர்த்தம் செய்துகொள்ள வேண்டாம். விதவிதமான, புதுப்புது வகை முத்தங்களை கண்டுபிடிப்பதில் ஒவ்வொருவரும் ஒரு வாத்ஸ்யாயனர் தான். 

தமிழ் சினிமாவில் நெடுங்காலமாக முத்தம் என்றாலே கமல் என்று ஒரு கண்ணோட்டத்தை நுழைத்துவிட்டார்கள். பாலிவுட்டின் எம்ரான் ஹாஸ்மி போன்றவர்களின் காதுக்கு இதுபோன்ற விஷயங்கள் எட்டிவிடாமல் பார்த்துக்கொள்ள வேண்டும். கமல் நிறைய படங்களில் ஹீரோயினை முத்தத்துக்கு தயார் செய்து, ஹீரோயின் தன் கழுத்தை சாய்த்து, கண்களை மூடி, உணர்வுகளை பெருக்கும் தருவாயில் வேண்டுமென்றே பின்வாங்கி ஹீரோயினையும் படம் பார்க்கும் ரசிகர்களையும் வெறுப்பெற்றுவார். 

மங்காத்தாவில் அஜித் – திரிஷா முத்தக்காட்சி திட்டமிடப்பட்டு அஜித் திரிஷாவின் உதட்டை மெல்ல நெருங்கி... நெருங்கி... இதுவே இக்காட்சிக்கான உணர்வைக் கொடுத்துவிட்டது முத்தமெல்லாம் வேண்டாம் என்று சொல்லிவிட்டாராம். இதனால் திரிஷா ரொம்ப அப்செட் என்று ஒருவேளை இதெல்லாம் படக்குழுவினர் ப்ரோமோவுக்காக ஜாலியாக கிளப்பிவிட்ட விஷயமாகக் கூட இருக்கலாம். 

துப்பாக்கியில் இதே போல விஜய், காஜல் அகர்வாலின் உதட்டை நெருங்கி வந்து முத்தமிடும் சமயத்தில் அவருக்கு வேறொரு விஷயம் (ஒருவேளை அகர்வால் கடை ரசகுல்லா) நினைவுக்கு வந்துவிட, போட்டது போட்டபடி கிளம்பிவிடுவார். அடுத்த காட்சியில் காஜல் விஜய் முன் தோன்றி முத்தத்தின் நற்பயன்களை ஒரு வாட்ஸப் ஃபார்வர்டில் படித்ததை விவரிக்கிறார். ஒரு முத்தமானது நாற்பது கலோரிகளை எரிக்கிறதாம். அதாவது முப்பது நிமிட நடை அல்லது இருபது நிமிட நீச்சல் அல்லது பத்து நிமிட ஸ்கிப்பிங் அல்லது ஐந்து நிமிட... என்று நீட்ட, விஜய் மீண்டும் முத்தமிடத் தயாராகி இம்முறை யாரோ கதவைத் தட்டுகிறார்கள். யாரோ என்ன யாரோ. சென்சார் அதிகாரிதான். சென்சார் கெடுபிடிகள், யூ சான்றிதழ், வரி விலக்கு போன்ற இத்யாதிகளை மனதில் கொண்டு இப்பொழுதெல்லாம் யாரும் முத்தக் காட்சிகள் பக்கமே போவதில்லை. அப்படியே வைத்தாலும் அதற்கு தனி செலவுகள் வேறு. முத்தக்காட்சி என்றால் ஹீரோயினுக்கு (ஏன் ஹீரோவுக்கு கிடையாது ?) கூடுதலாக பத்து லட்சம் தர வேண்டும். இல்லையேல் ஹீரோயின் பால் பாட்டில் நிப்பிளுக்கு முத்தம் தருவார். அதைக் கொண்டு பத்து லகர செலவில் கிராபிக்ஸ் செய்துகொள்ள வேண்டும்.

முத்தத்தின் ஆதி தோற்றம் பற்றி உறுதியாகக் கூறுவதற்கில்லை. ஏனெனில் முத்தம் வரலாற்றை விட மூத்தது. விலங்குகளிடமிருந்து முத்தமிட்டுக் கொள்ளும் பழக்கம் மனிதனுக்கு தோன்றியிருக்கலாம் என்று கருதப்படுகிறது. நமக்கு கிடைத்துள்ள வரலாற்று குறிப்புகளை வைத்து பார்க்கும்போது முத்தத்தின் பிறப்பிடம் நம் இந்தியா ! ஏறத்தாழ மூன்றாயிரம் ஆண்டுகளுக்கு முன் வடிக்கப்பட்ட கஜுராஹோ சிற்பங்களில் உதட்டு முத்தத்தை செதுக்கி வைத்திருக்கிறார்கள் நம் முன்னோர்கள். (இப்போதாவது முட்டாள் இல்லை என்று நம்புவீர்களா ?. எழுத்தில் முதன்முதலில் முத்தத்தை பதிவு செய்ததும் இந்தியாதான். இந்திய இதிகாசமான மகாபாரதத்தில் முத்தத்தை குறித்து எழுதியிருக்கிறார்கள். அலெக்சாண்டர் இந்தியாவின் மீது படையெடுத்த போது இந்தியாவிலிருந்து முத்தம் கிரேக்கத்திற்கு பரவியது.

நிறைவாக மரு.ரெட்டி முத்தத்தைப் பற்றி சொல்வது என்னவென்றால் முத்தம் மன அழுத்தத்தை குறைக்கும் ஒரு மருந்து, உறவைப் பலப்படுத்தும் சிமென்ட், சந்தோசம் தரும் டானிக். முத்தம் நோய் எதிர்ப்பு சக்தியை அதிகரிக்கும் மற்றும் கொலஸ்ட்ராலைக் குறைக்கும் என்றுகூட சமீபத்திய ஆய்வுகள் தெரிவிக்கின்றன.

வாட்ஸப் ஃபார்வர்ட் என்றாலே அது வதந்திதானே ! நம் அகர்வால் சொல்லும் முத்தம் குறித்த கலோரி கணக்கும் தவறுதான். சராசரியாக ஒரு நிமிட உதட்டு முத்தம் ஒன்றிலிருந்து இரண்டு கலோரிகளை எரிக்கும். வேகமான நடையில் நிமிடத்திற்கு ஐந்திலிருந்து ஆறு. நீச்சலில் சராசரியாக பத்து. காஜல் தளபதியிடமிருந்து முத்தம் பெறுவதற்காக பொய் சொல்லியிருக்கிறார்.

என்றும் அன்புடன்,
N.R.PRABHAKARAN

Post Comment

6 July 2018

விக்டரின் திருமண விழா !

அன்புள்ள வலைப்பூவிற்கு,

அன்றைய தினம் ஒருபுறம் விக்டரும் லிசாவும் திருமணம் செய்துகொள்ள, மறுபுறம் விக்டருக்கும் சத்யாவுக்குமான நட்பு இன்னொரு புதிய அத்தியாயத்திற்குள் அடியெடுத்து வைத்தது !

விக்டரின் திருமண விழாவிற்கு அவன் மீது ஒருதலையாய் மையல் கொண்டிருந்த பெண்கள் எல்லாம் வந்திருந்தார்கள். விக்டரையும் லிசாவையும் ஜோடியாகக் கண்டதும் ஆற்றாமையால் புலம்பத் துவங்கினாள் ஒருத்தி. இன்னொருத்தியோ அவன் மீது பொய்க்கோபம் கொண்டு அடிக்கப் போனாள். ஒருத்தி, இதோ மேடையேறி வந்து உன்னுடன் நின்று கொள்கிறேன் என்று பாய, மற்றவள்கள் அவளை பிடித்து நிறுத்தினார்கள். இதற்குள் ஒருத்தி ஏதோ நடந்தது நடந்துவிட்டது, விக்டர் தனக்கு பொருத்தமானவளைத் தானே தேர்வு செய்திருக்கிறான் என்றதும், மற்றவர்கள் அதனை ஆமோதித்து விக்டரை வாழ்த்தத் தயாரானார்கள். இப்படித்தான் விக்டரின் மணவிழா துவங்கியது.

ஒரு பக்கம் மணக்க, மணக்க பிரியாணி தயாராகிக் கொண்டிருந்தது. சத்யாதான் எல்லா ஏற்பாடுகளையும் செய்திருந்தான். சத்யா என்பவன் விக்டரின் நெருங்கிய நண்பன். ‘நெருங்கிய’ என்றதும் சின்ன வயதில் இருந்து பழக்கம் என்று நினைத்துக் கொள்ளவேண்டாம். வெறும் ஆறே மாதங்கள். ஆனால் இந்த ஆறு மாதங்களில், ஆறு போல நிறைய திருப்பங்கள் நிகழ்ந்துவிட்டன. ஒரு வகையில் பார்த்தால் சத்யா இல்லாவிட்டால் விக்டர் இப்போது உயிருடன் கூட இருந்திருக்க மாட்டான்.

வேலூர் சிறை. அங்கேதான் முதல்முறையாக சத்யாவை சந்தித்தான் விக்டர். ஆசைத்தம்பியின் ஆட்கள் விக்டரை கொல்லத் திட்டமிட்டிருப்பதாக தகவல் சொன்னான் சத்யா. முதலில் விக்டர் அதனை தீவிரமாக எடுத்துக்கொள்ளவில்லை. அவன் கொஞ்சம் அசந்திருந்த சமயம் எட்டு கைதிகள் சேர்ந்து அவனை சுற்றி வளைத்தபோதுதான் அவனுக்கு உரைத்தது. இருந்தாலும் அவன் அசரவில்லை. கையில் கிடைத்த பொருட்களையும், சமயத்தில் கைகளேயும் ஆயுதமாக பயன்படுத்தி அவர்களை திக்குமுக்காடச் செய்தான். அதே சமயம் விக்டர் இளைப்பாற நினைத்த இரண்டு நொடி இடைவேளையில் எட்டில் ஒருத்தன் அவனை கத்தியால் குத்த வர, அங்கே பிரவேசித்தான் சத்யா. ஒருவேளை சத்யா வராவிட்டால் அப்போதே வெளியே வந்திருக்கும் விக்டரின் குடல். நன்றி சொல்லிக் கொள்ளக்கூட விக்டருக்கு நேரமில்லை. சத்யாவும் சேர்ந்துகொண்டான். எழுதிக்கொண்டிருக்கும் இந்த பத்தியை நிறைவு செய்யும் முன் அவசர அவசரமாக அவர்கள் இருவரும் சேர்ந்து எட்டு பேரையும் துவம்சம் செய்து முடித்தார்கள்.

அன்றிலிருந்து சத்யாவுக்கும் விக்டருக்கும் இடையே நல்ல நட்பு உருவானது. குறிப்பாக விக்டர் சத்யாவை மானசீகமாக நேசிக்க ஆரம்பித்தான். நாட்கள் நகர்ந்தன. ஒருமுறை சத்யாவையும் விக்டரையும் வெவ்வேறு வழக்குகளுக்காக மாஜிஸ்திரேட் முன்னிலையில் ஆஜர் படுத்த வேண்டியிருந்தது. அதற்காக அவர்களை காவல் துறையினர் அழைத்துச் சென்றபோது, இருவரும் முன்பே திட்டமிட்டிருந்தது போல காவலர்களை தாக்கிவிட்டு துப்பாக்கிமுனையில் தப்பித்தார்கள். அதுமுதல் அவர்களது நட்பு கூடுதல் பலம் பெற்றது.

சிறையிலிருந்து தப்பித்ததும் விக்டர் முதல் வேலையாக லிசாவைப் போய் சந்தித்தான். சத்யாவுக்கும் அவளை அறிமுகப்படுத்தினான். விக்டருக்கும் லிசாவுக்கும் காதல். வன்மையான காதல் என்று சொல்லலாம். ஒருவேளை விக்டர் இதிகாசங்களில் வருவது போல வனவாசம் சென்று வந்தாலோ, அல்லது இரட்டை ஆயுள் தண்டனை பெற்று திரும்பி வந்தாலோ கூட லிசா அவனுக்காக காத்துக்கொண்டிருப்பாள். விக்டரும் அவ்விதமே அவளைக் காதலித்தான். சத்யாவின் நட்பு கிடைத்தபிறகு விக்டரின் காதல் பயணங்களுக்கெல்லாம் சாரதியானான் சத்யா. விக்டரையும் லிசாவையும் காரின் பின்னிருக்கையில் உட்கார வைத்து சாகசங்கள் செய்து காட்டுவான் சத்யா. அவனது வித்தைகள் விக்டரைக் கவர்ந்தன. சத்யாவை சரியான முறையில் பயன்படுத்திக் கொள்ள வேண்டுமென்று நினைத்து வைத்திருந்தான். ஒரு வகையில் அவனது திருமணமே அதற்கான துவக்கமாக அமைந்தது.

ஏனென்றால் விக்டரின் திருமணத்திற்கு அவனது குழுத்தலைவன் மேத்தீவ் வந்திருந்தான். மேத்தீவ் ஒரு முன்னாள் பாதிரியார். பதிமூன்று வயதிலேயே தனது வாழ்க்கையை மதத்துக்காக அர்ப்பணித்துக் கொண்டவன். ஆனால் துரதிர்ஷ்டவசமாக மேத்தீவின் அன்புக்கு பாத்திரமாய் அவனுடனிருந்த சிறுவன் ஒருநாள் கொல்லப்பட, மேத்தீவ் துப்பாக்கி தூக்க வேண்டிய துர்பாக்கிய சூழல் ஏற்பட்டுவிட்டது. அதன்பிறகு மேத்தீவ் துப்பாக்கியை கீழே வைக்கவே இல்லை. நெல்லை, நாகர்கோவில், கன்னியாகுமரி என்று தென் மாவட்டங்களில் மேத்தீவின் கை ஓங்கத்துவங்கி இன்று சென்னை, பெங்களூரு போன்ற பெருநகரங்களில் கூட புழங்கத் துவங்கிவிட்டான். கஞ்சா, கொக்கைன் போன்ற போதை மற்றும் போதை தொடர்பான வஸ்துகளை டீல் செய்வது மேத்தீவின் பிரதானத் தொழில். மற்றபடி ஆளைத் தூக்குவது முதல் ஆளையே தூக்குவது வரை எல்லா முறையற்ற வேலைகளையும் செய்பவன் மேத்தீவ் !

திருமண நிகழ்வில் வைத்து மேத்தீவையும், சத்யாவையும் பரஸ்பரம் அறிமுகம் செய்து வைத்தான் விக்டர். அறிமுகப்படுத்தியதும் சத்யா மேத்தீவிடம், நான் உங்க ஃபேன் தல என்றது மேத்தீவை கவர்ந்திருக்கக்கூடும். கொஞ்ச நேரத்திலேயே சத்யாவும், மேத்தீவும் இயல்பாகப் பேசிக்கொள்வதும், மேத்தீவ் சத்யாவை கிண்டலடிப்பதுமாக இணக்கமாகியிருந்தார்கள். இதற்குள் திருமண நிகழ்வு ஆட்டம் பாட்டம் என்று களை கட்டத் துவங்கியிருந்தது. விக்டரின் காதலிகள் ஒரு பக்கம் ஆட, லிசாவின் கடைக்கண் அனுமதி பெற்று விக்டரும் ஆடத்துவங்க, விக்டர் அவனது தலைவன் மேத்தீவையும் உடனாட அழைத்தான். மேத்தீவோ புது நண்பன் சத்யாவை ஆடச்சொல்லி தள்ளிவிட்டு, ஒதுங்கிக்கொண்டான். அதன்பிறகு சத்யாவும் விக்டரும் சேர்ந்துப் போட்ட குத்தாட்டத்தில் அந்த மாலைப்பொழுது ஆரவாரமானது.

விழாவுக்கு வந்திருந்த தன் மற்ற நண்பர்களையும், சகாக்களையும் சத்யாவுக்கு அறிமுகம் செய்துவைத்தான் விக்டர். ஆச்சர்யமாக அவர்கள் அனைவரையும், அவர்களது குற்றப் பின்னணியுடன் சேர்த்து தெரிந்து வைத்திருந்தான் சத்யா. விழா முடிந்தபிறகு மேத்தீவிடம் சத்யாவை அழைத்துச் சென்றான் விக்டர். சத்யாவின் கார் டிரைவிங் பிரஸ்தாபங்களை அவன் மேத்தீவிடம் ஒப்புவித்தான். சத்யாவையும் அவர்களது குழுவில் சேர்த்துக்கொள்ள கோரினான். மேத்தீவின் தொழிலுக்கும் சாகசக்கார வாகன ஓட்டுநர் என்பது அவசியத்தேவையாய் இருந்தது. மேத்தீவின் வலது கையாயிருந்தவன் மட்டும் ஏனோ ஆரம்பம் தொட்டே சத்யாவை சந்தேகமாகப் பார்த்துக்கொண்டிருந்தான். இருப்பினும் விக்டரின் நம்பிக்கையான வார்த்தைகளுக்கு இசைந்தான் மேத்தீவ். 

அன்றைய தினம் ஒருபுறம் விக்டரும் லிசாவும் திருமணம் செய்துகொள்ள, மறுபுறம் விக்டருக்கும் சத்யாவுக்குமான நட்பு இன்னொரு புதிய அத்தியாயத்திற்குள் அடியெடுத்து வைத்தது !

என்றும் அன்புடன்,
N.R.PRABHAKARAN

Post Comment

5 July 2018

கோவா – டிட்டோஸ் லேன்

அன்புள்ள வலைப்பூவிற்கு,

முந்தைய பகுதி: கோவா – அட்வெஞ்சர்

கோவா என்றாலே நம் நினைவுக்கு வரும் தொடர்புடைய சொல் பார்ட்டி! குறிப்பாக, என் சக பிரயாணிகள் இருவரும் பப், டிஸ்கோ போன்ற லெளகீக விஷயங்களில் மிகுந்த ஆர்வம் கொண்டிருந்தார்கள். கோவாவில் தங்க திட்டமிட்டிருந்த நான்கு இரவுகளுக்கு இரவுக்கொன்றாக நான்கு பப்புகளுக்கு போகலாம் என்றால் கூட தயாராக இருந்தார்கள். எனக்கும் ஆசைதான் என்றாலும் ஏதோ நெருடலாக இருந்தது. இதுபோன்ற பப், கிளப், டிஸ்கோவில் பிரதானமான விஷயங்கள் மூன்று – மது, நடனம், பெண்கள் ! இதனைக் சகாக்களிடம் சொல்லி NSA, ஒன் நைட் ஸ்டாண்ட் போன்ற திட்டங்கள் ஏதேனும் இருக்கிறதா என்று விசாரித்தேன். அவர்கள் தீர்மானமாக மூன்றாவது விஷயத்தில் ஆர்வம் இல்லை என்றும், மது மற்றும் நடனம்தான் அவர்களது குறிக்கோள் என்றும் ஒப்புக்கொண்டார்கள் அல்லது சாமர்த்தியமாக அவர்களிடமிருந்து அப்படியொரு வாக்குமூலத்தை முன்னெச்சரிக்கையாக பெற்றுக்கொண்டேன்.

அதன்பிறகு ட்ரிப் அட்வைஸர் துவங்கி ஸோமேட்டோ வரை கோவாவின் சிறந்த இரவு கேளிக்கை விடுதிகளை தேடத் துவங்கினோம். பெரும்பாலான தேடல்கள் டிடோஸ் பப், கபே மாம்போஸ், பாலிவுட் க்ளப், க்ளப் நோ எஸ்கேப் போன்ற பெயர்களில் வந்து முடிவதை கவனித்தோம். கிடைத்த சித்திரங்களை எல்லாம் ஒன்றிணைத்து பார்த்தபோது கோவாவின் முக்கியமான கேளிக்கை விடுதிகள் எல்லாம் ஒரே தெருவில் இருந்தன – அதுதான் டிடோஸ் லேன் ! அதுவும் கோவாவின் மிகப் பிரபலமான கடற்கரையான பாகா கடற்கரைக்கு அருகே அமைந்திருந்தது டிடோஸ் லேன். எந்த பப் ? எந்த க்ளப் ? என்று எதுவும் தீர்மானித்துக் கொள்ளவில்லை. எங்கள் வடக்கு கோவா பயணத்தில் ஒரு இரவை டிடோஸ் லேனுக்காக ஒதுக்கிக்கொண்டோம். அங்கே போய் இணக்கமான பப்பில் ஐக்கியமாகிவிடலாம் என்பது திட்டம்.

டிட்டோஸ் லேன் (காலியான சமயத்தில்)
திட்டமிட்ட தினத்தில் இரவு சுமார் எட்டரை மணியளவில் டிடோஸ் லேனை அடைந்தோம். ஸ்கூட்டரை தெருவுக்கு வெளியிலேயே பாதுகாப்பான இடத்தில் பார்க் செய்துவிட்டு நடக்கத் துவங்கினோம். குறிப்பிட்ட அத்தெருவை நெருங்கும் முன்பே பப்புகளுக்கு ஆள் பிடிக்கும் புரோக்கர்கள் எங்களை அணுகி அழைக்கத் துவங்கிவிட்டார்கள். சென்னை பர்மா பஜாரையொட்டி நீங்கள் ரேண்டமாக நடந்துபோனால் அங்குள்ள ஆசாமிகள் இந்தியாவில் உள்ள பிராந்திய மொழிகளின் பட்டியலையோ அல்லது பிரபல நடிகைகளின் பட்டியலையோ உங்களிடம் ஒப்பித்துக் காட்டுவார்கள். அதுபோல டிட்டோஸ் லேன் புரோக்கர்கள் உடைந்த ஆங்கிலத்தில் அளவில்லா சாப்பாடு, அளவில்லா மது, நடனம், பெண்கள் என்பதை திரும்பத் திரும்பச் சொல்லிக் கொண்டிருக்கிறார்கள். புத்தகக் காட்சியில் விலைப்பட்டியல் வாங்குவது போலவோ, ரிச்சி ஸ்ட்ரீட்டில் எஸ்டிமேட் வாங்குவது போலவோ எல்லா ப்ரோக்கர்களிடமிருந்தும் விவரங்களை சேகரித்துக்கொண்டே தெருவிற்குள் நுழைந்தோம். இரு மருங்கிலும் பிரகாசமான விளக்கொளி மின்னிக்கொண்டிருந்தன. நிறைய க்ளப்புகளிலிருந்து இசை தெரு வரைக்கும் இரைந்துக் கொண்டிருந்தது. மசாஜ் பார்லர்கள் வேறு ஒரு பக்கம். ரொம்ப விசாலமாக நடந்து செல்ல இடமில்லாமல் கூட்டமாக இருந்தது. அக்கூட்டத்தில் மித வேகத்தில் ஸ்கூட்டி ஒட்டிக்கொண்டு வந்த ஒரு அங்கிள் எங்களிடம் வந்து, மவுண்ட் ரோடுக்கு இப்படி போனால் போகலாமா என்று கேட்பது போல 'ஃபுல் மஸாஜுக்கு' ஆசை காட்டினார். டிடோஸ் லேன் கிட்டத்தட்ட ஒரு மினி தாய்லாந்து !

பிரபலமான கபே மாம்போஸ்
ஸ்கூட்டி மாமா ஆசை காட்டியதில் எங்களுடன் வந்த நண்பர் ஒருவருக்கு மசாஜ் ஆசை வந்துவிட்டது. நாங்கள் வேண்டாம் என்று சொல்லிப் பார்த்தோம், கேட்கவில்லை. இடையே ஒரு மசாஜ் பார்லர் வாசலில் சில வடகிழக்கு பெண்கள் அமர்ந்திருந்தனர். பார்லர் திறந்துதான் இருந்தது. நம்ம ஆள் மசாஜ் மீதுள்ள ஆர்வத்தில் எங்கள் கட்டுப்பாடை மீறி, அந்த வடகிழக்கு பெண்களையும் கடந்து மசாஜ் பார்லருக்குள் நுழைந்துவிட்டார். அவ்வளவுதான். திடீரென அங்கிருந்த வ.கி. பெண்கள் பதற்றமடைய, ஜிம் பாய்ஸ் போன்ற சிலர் அங்கே வந்துசேர ஒரே கலவரமாகிவிட்டது. ஒருவேளை உள்ளே யாருக்கோ ஃபுல் மஸாஜ் நடந்துக்கொண்டிருந்தது போல. அப்புறம் நம்ம ஆள் தகவல் தெரிந்துகொள்ள வந்தேன் என்றதும் அவர்கள் ஆசுவாசமாகி நண்பருக்கு விளக்க ஆரம்பித்தனர். டிடோஸ் லேனில் வழக்கத்தை விட கூடுதல் கவனமாக இருக்க வேண்டும் என்பதற்காக இதனைச் சொல்கிறேன்.

குறிப்பாக டிடோஸ் லேனில் உள்ள சில பப்புகளில் இந்தியர்களை மரியாதைக்குறைவாக நடத்துவதாகவும், சமயத்தில் வன்முறையை பிரயோகிப்பதாகவும் படித்து அறிந்தேன். டிடோஸ் லேனின் மத்தியில் ‘காமாக்கி’ என்றொரு பப் உள்ளது. முதலில் பெயரை காமாக்ஷி என்று படித்துவிட்டு கடாட்சம் பொருந்திய பெயராக இருக்கிறதே என்று யோசித்துக்கொண்டிருந்தேன். பின்னர் அது ரஷ்ய அல்லது கிரேக்க மொழி வார்த்தை என்று தெரிந்துகொண்டேன். இந்த காமாக்கியைப் பற்றி இணையத்தில் விமர்சனங்கள் படித்தால் அதன் உரிமையாளர் அங்கே வெளிநாட்டினர் வருவதை மட்டுமே விரும்புவதாகவும், இந்தியர்கள் வந்தால் மரியாதைக்குறைவாக நடத்துவதாகவும் தெரிந்துக்கொள்ளலாம். பிரபலமான பப்களான டிட்டோஸ் பப், கபே மாம்போஸ் எல்லாம் கூட்டமாகவும், கட்டுப்பாடுகள் நிறைந்ததாகவும், போதாதற்கு விலை அதிகமாகவும் இருந்தன. நீண்ட நேரம் குறுக்கும் நெடுக்குமாக டிட்டோஸ் லேனில் நடந்து, பின் ஒரு பப்பை தேர்வு செய்தோம். அவசரமாக அதன் உள்ளே பிரேவசிக்க முயன்றால் அதன் வாயிலில் இரண்டு அரக்கர்கள் எங்களை தடுத்து நிறுத்தி கப்பிள்ஸ் ஒன்லி என்றார்கள். நாங்கள் சோகமாக திரும்பி நடக்க எங்களை பின்தொடர்ந்து வந்த ஒரு நபர் பெண்களை தயார் செய்கிறேன் என்று எங்கள் காதில் கிசுகிசுத்தார். மறுத்துவிட்டு நகர்ந்தோம்.

ஒரு பக்கம், ஹை ப்ரொஃபைல் விடுதிகள், மறுபக்கம் புரோக்கர்கள். இவர்களுக்கு மத்தியில் மிகவும் குழம்பித்தான் போயிருந்தோம். ஆனால் எங்கேயாவது ஒரு இடத்தில் செட்டிலாகிவிட வேண்டும் என்பதில் மட்டும் தீர்மானமாக இருந்தோம். அப்படியே காலாற கடற்கரை பக்கம் ஒதுங்கினால் அங்கே ஏராளமான குடில் உணவகங்களுக்கு மத்தியில் ஒரேயொரு குடில் உணவகம் மட்டும் இசை மற்றும் நடனத்துடன் ஆரவாரமாக இருந்தது. அந்த உணவகத்தின் பெயர் சாம்’ஸ் பீச் ஷாக் !

சாம்'ஸ் பீச் ஷாக்
ஒப்பன் டான்ஸ் ஃப்ளோர். யார் வேண்டுமானாலும் உள்ளே நுழைந்து ஆடலாம். வாங்கும் திரவ, திடப்பொருட்களுக்கு மட்டும் பணம் கொடுத்தால் போதும். கொஞ்ச நேரம் அதனருகே நின்று வேடிக்கை பார்த்தோம். நமது தேவை என்ன ? நம் சகப் பிரயாணிகளின் தேவை என்ன ? – மது, நடனம். அவ்வளவுதானே. தீர்மானித்தோம். ஸ்கூட்டர்களை டிட்டோஸ் லேன் முடிவிலிருந்த நீளமான, நெரிசலான பார்க்கிங்கில் கொண்டு வந்து விட்டோம். அப்போதே மணி பத்தை தாண்டியிருந்தது. சாம்ஸில் விசாரித்தபோது பதினோரு மணிக்கு டான்ஸ் ஃப்ளோரை க்ளோஸ் செய்துவிடுவார்கள் என்று சொன்னார்கள். யோசிக்க நேரமில்லை. நேரடியாக பார்டென்டரிடம் சென்று ஆளுக்கு ஒரு டின் பியரை வாங்கி, சாத்திவிட்டு நடன ஜோதியில் ஐக்கியமானோம். 

பக்கவாட்டுத் தோற்றம்
இங்கே ஒரு விஷயம். டிவியில் நிறைய டான்ஸ் ஷோ பார்க்கிறோம். சினிமா பார்த்துவிட்டு அஜித்துக்கு ஆடவே தெரியவில்லை. ரஜினிக்கு வாய் மட்டும்தான் ஆடுகிறது என்றெல்லாம் நக்கலடிக்கிறோம். ஆனால் திடீரென டான்ஸ் ஃப்ளோரில் போய் நின்றதும் என்ன ஆடுவது, எப்படி ஆடுவது என்று தெரியவில்லை. முதல் பத்து நொடிகளுக்கு ஒருவர் முகத்தை ஒருவர் பார்த்துக்கொண்டு நின்றிருந்தோம். அப்புறம் மெதுவாக கை, காலை அசைத்து, குதித்து, கொஞ்ச நேரத்திற்கெல்லாம் சாமியாடத் துவங்கிவிட்டோம். ஆனால், அந்த டான்ஸ் ஃப்ளோரில் ஆடிய நிறையப் பேர் அசல் ஆட்டக்காரர்கள். குறிப்பாக இந்த பெண்களின் இடைப்பகுதி என்னென்ன சாகசங்கள் எல்லாம் செய்யும் என்று அந்த இரவு எனக்கு கற்றுத் தந்தது. ஆண்களோ நீ யாரோ, நான் யாரோ என்ற பாகுபாடெல்லாம் இல்லாமல் இஷ்டத்துக்கு எல்லோருடனும் சேர்ந்து, இன்முகத்துடன் ஆடிக்கொண்டிருந்தார்கள். அன்றைய இரவில் அந்த டான்ஸ் ஃப்ளோர் சாதி, மத, இன, மாநில, நிற வேறுபாடுகளை மறந்திருந்தது. நிர்வாகம் சொன்ன நேரத்தை விட அரை மணிநேரம் கூடுதலாகவே டான்ஸ் ஃப்ளோரை இயக்கியது. சுமார் ஒன்றரை மணிநேரம் ஆடியிருப்போம் என்று நினைக்கிறேன். கிட்டத்தட்ட பரவச நிலை !

டான்ஸ் ஃப்ளோர் நேரம் முடிந்ததே தவிர உணவகத்துக்கு அல்ல. அதன்பிறகு காக்டெயில் அருந்தியபடி, ஸீஃபுட் ப்ளாட்டர் சாப்பிட்டு இரவு சுமார் ஒன்றரை மணி வரை அங்கே களித்துவிட்டு திரும்பினோம்.

அடிக் களைத்தபின்
என் கோவா பயணத்தில் என்னால் மறக்கவே முடியாத சில பரவச அனுபவங்களில் ஒன்று சாம்ஸ் பீச் ஷாக்கில் குத்தாட்டம் போட்டது.

டிடோஸ் லேன் செல்பவர்களுக்கு சில அறிவுரைகள் –

- புரோக்கர்களிடம் கவனமாக இருங்கள். உங்களைத் தேடி வரும் ஆஃபர்கள் கண்டிப்பாக மொக்கையாகத்தான் இருக்கும். எனவே தவிர்த்தல் நலம்.
- முன்பே சொன்னது போல காமாக்கி போன்ற பப்களை தவிர்க்கவும்.
- இது நம்ம ஊரு கிடையாது என்ற நினைப்பை எப்போதும் வைத்துக்கொள்ளுங்கள். அளவான குடி, நிம்மதியான பயணம். எங்கேயாவது போய் கலாட்டா செய்து மாட்டிக்கொண்டால் உங்களுக்கு மட்டுமில்லாமல் உங்களுடன் வந்தவர்களுக்கும் தொந்தரவு.
- வாகனங்களை பார்க் செய்வது கடினமான ப்ராஸஸ். மாலை ஏழு மணிக்கு முன்பாக சென்றுவிட்டால் ஓரளவுக்கு செளகர்யமாக பார்க் செய்துகொள்ளலாம்.
- நள்ளிரவு தாண்டியபிறகும் கூட டிடோஸ் லேனிலிருந்து வெளியேறும் சந்திப்புகளில் போக்குவரத்து காவல் அதிகாரிகள் காத்திருக்கிறார்கள். எனவே கடைசி டிரிங்குக்கும் கிளம்புவதற்கும் இடையே போதுமான இடைவெளி விடுவது நல்லது.
- எதற்கு ஸ்கூட்டர் தொல்லை ? டாக்ஸி பிடித்துக்கொள்ளலாம் என்று நினைத்தீர்களானால் நள்ளிரவில் அறை திரும்ப டாக்ஸி கிடைக்காமல் அவதியுருவீர்கள்.

கோவா பயண சீரிஸில் அடுத்து எழுத வேண்டிய முக்கியமான விஷயம் கஸினோ. ஆனால், அதற்கு முன்பாக கோவாவில் கடற்கரைகள் தவிர்த்து பார்க்க வேண்டிய இடங்கள் என்னென்ன உள்ளன என்ற ஒரு தொகுப்பை பார்த்துவிடலாம்.


என்றும் அன்புடன்,
N.R.PRABHAKARAN

Post Comment